“Yaşıl İncəsənət” üçüncü rəsm sərgi-müsabiqəsinə yekun vurulub.

01 Fevral tarixində Azərbaycan Milli İncəsənət Muzeyində “ASAN Könüllülük” Məktəbinin “Yaşıl ASAN” proqramı, Ekologiya və Təbii Sərvətlər Nazirliyi, Azərbaycan Dövlət Rəssamlıq Akademiyasının təşkilati, “ITOCHU oil” şirkətinin maliyyə dəstəyi ilə iqlim dəyişikliyinə qarşı mübarizəyə həsr edilmiş “Yaşıl İncəsənət” üçüncü rəsm sərgi-müsabiqəsinin bağlanış mərasimi keçirilib.

Müsabiqəsinin məqsədi iqlim dəyişikliyi ilə mübarizə aparmaq, təsirlərin azaldılması üçün tədbirlər həyata keçirmək və ona uyğunlaşmaq yolunda zəruri addımlar atılmasıdır. Həmçinin müasir incəsənətdə mənzərə və natürmort janrlarının rolunu və əhəmiyyətini artırmaq, gənc nəslin ətraf mühitin mühafizəsinə, Azərbaycanın relikt flora və fauna nümunələri və təbiət qoruqlarının bənzərsiz gözəlliklərinə maraq və diqqətini cəlb etmək əsas hədəflərdir.