Görkəmli rəssam, Azərbaycan avanqardının banisi Cavad Mircavadovun (1923-1992) əsərləri folklordan qaynaqlanan motivləri, dərin fəlsəfi yükü ilə fərqlənir. Onun tablolarında təsvir edilən obrazlar, istifadə olunan ifadə vasitələri orijinallığı və qeyri-adiliyi ilə seçilir. Ekspressiv xarakterə malik əsərlərinin əsas qəhrəmanları sırasında divlər, cinlər, qorxulu varlıqlar önəmli yer tutur. “Planetin çığırtısı” tablosu sənətkarın dünyaya, onun təzadlı hadisələrinə, insan faciələrinə səbəb amansız müharibələrə, ümumilikdə isə xeyir və şər arasındakı daimi mübarizəyə həsr edilən yaradıcılıq nümunələrindəndir. Rəssam burada yaşadığı dünyaya münasibətini bədən hissələri metamarfoza uğramış qorxunc qroteskli obrazlar, fantastik məxluqlar vasitəsilə ifadə etmişdir. Səthi-sxematik tərzdə işlənilmiş kompozisiya sənətkarın palitrasına xas coşqun, dekorativ boyaların özünəməxsus ahənginə əsaslanır.