Azərbaycan Milli İncəsənət Muzeyinin kolleksiyasında Xalq rəssamı Tahir Salahovun (1928-2021) dünyaca məşhur “Sənə, bəşəriyyət!” əsəri xüsusi yer tutur. Bu monumental tablo Tahir Salahovun yalnız yaşadığı dövrün deyil,  hətta gələcəyə aid hadisələrin mahiyyətini aça bilmək, zamanı qabaqlamaq kimi fövqəladə istedadını əks etdirir. “Sərt üslub”un parlaq nümayəndəsi olan Tahir Salahov bu əsərini ilk dəfə 1961-ci il aprelin 12-də Bakıda təşkil edilmiş respublika bədii sərgisində nümayiş etdirmişdir. Mavi səmada uçan iki insan fiquru Yuri Qaqarinin şücaətinə romantik himn kimi qəbul edilmiş və cəmiyyətdə geniş əks-səda doğurmuşdu. Burada kosmosa ilk uçuş, kainatın fəth edilməsi kimi insan zəkasının möhtəşəm təntənəsi əksini tapıb. Tahir Salahovun müəllifi olduğu əsər haqqında söyləmişdir: “1959-cu ildə, insanın kosmosa uçuşundan iki il əvvəl gecənin bir vaxtı mən qəflətən yuxudan ayıldım və kosmik səmada yanar ulduzlar arasında uçan, antik çöhrəli kişi və qadın eskizi çəkdim. Az sonra mən həmin eskizi kətan üzərinə köçürdüm və məhz Yuri Qaqarin kosmosa uçan gün bu işi sərgidə nümayiş etdirdim”.