Əməkdar incəsənət xadimi Toğrul  Sadıqzadə (1926-1995) 1937-ci ildə repressiyaya uğramış Azərbaycanın dəyərli ziyalıları - tanınmış yazıçı Seyid Hüseyn və şairə Ümmügülsümün ailəsində dünyaya gəlib.  Əzim Əzimzadə adına Azərbaycan Dövlət Rəssamlıq Məktəbinin məzunu olmuş rəssam 1950-ci illərdən respublika, ümumittifaq və beynəlxalq sərgilərdə fəal iştirak etmişdir. Milli rəssamlıq ənənələrinə maraq göstərmiş istedadlı fırça ustasına Füzulinin "Leyli və Məcnun” poemasına çəkdiyi miniatürlər, eləcə də böyük ustalıqla yaratdığı portretləri geniş şöhrət qazandırmışdır. “Orta əsr saxsı qabları” natürmortu rəssamın milli irsə bağlılığının ifadəçisi olaraq Azərbaycan xalq sənətkarlığının dəyərli hissəsini təşkil edən keramika sənətinə həsr olunub. Məharətlə qurulmuş kompozisiya natürmort elementlərinin dəqiqliyi, özünəməxsus kolorit həlli ilə seçilir.