AMİM Uşaq muzeyi

Muzeyimizdə uşaqlar üçün təşkil olunan xüsusi tədbirlər kiçik ziyarətçilərin incəsənətə, tarixə və elmlərə marağını artırmaq məqsədi daşıyır. Bu tədbirlərdə uşaqlar əyləncəli və interaktiv formada yeni biliklər qazanır, yaradıcılıq qabiliyyətlərini inkişaf etdirirlər. Əlamətdar və tətil günləri ilə bağlı olan proqramlar, interaktiv ekskursiyalar, art terapiya, xüsusi qayğıya ehtiyacı olan uşaqlar üçün inklüziv ustad dərsləri, cizgi filmi və kino nümayişləri vasitəsilə uşaqlar muzey mühitində öyrənir və əylənirlər.

Hər həftənin şənbə və bazar günləri keçirilən “Uşaqlar üçün incəsənət tarixi” layihəsi mühazirə, tematik ekskursiya, ustad dərsi, viktorina, kvest oyunu kimi proqramları əhatə edərək Azərbaycan və dünya incəsənətinin müəyyən dövrünə həsr olunur. Azərbaycan, rus, ingilis dillərində təqdim edilən proqramlar saat 11:00 və 14:00-da muzeyin xüsusi uşaq sahəsində keçirilir.

Layihə məktəbəqədər və məktəbli uşaqlar üçün nəzərdə tutulub.İştirak üçün əvvəlcədən qeydiyyat tələb olunur. Ətraflı məlumatı muzeyin veb-saytından əldə edə bilərsiniz.

Əziz uşaqlar, sizi maraqlı məlumatlarla zəngin incəsənət və yaradıcılıq dünyasını kəşf etməyə dəvət edirik.

Muzeydə kino

Azərbaycan Milli İncəsənət Muzeyində hər həftənin şənbə və bazar günləri saat 17:00-da “Muzeydə kino” layihəsi çərçivəsində təsviri sənət və mədəniyyətin müxtəlif sahələrini təmsil edən görkəmli sənətkarlar haqqında filmlər nümayiş etdirilir. Muzey müxtəlif dövrlərdə yaşayıb-yaratmış Azərbaycan və dünya rəssamlarının əsərlərindən ibarət zəngin kolleksiyaya malikdir. Təqdim edilən ekran əsərləri həmin kolleksiya ilə əlaqələndirilir və tamaşaçılar tematik ekskursiya ilə bərabər, seyr edəcəkləri filmin köməyi ilə sənət insanlarının daxili dünyasını daha dərindən anlamaq imkanı əldə edirlər.

PROQRAM

Tarix – film – rejissor – janr

Qeyd: Kino seansları hər şənbə və bazar günləri saat 17:00-da  muzeyin kinozalında təşkil olunur. Hər seansdan sonra film üzərində qısa müzakirələr aparılır. Giriş sərbəstdir.

Sizi muzeyimizin bu maraqlı layihəsində iştirak etməyə dəvət edirik!

Muzeydə musiqi

Azərbaycan Milli İncəsənət Muzeyində hər həftənin 3-cü günü təqdim olunan “Muzeydə musiqi” layihəsi  milli, klassik və müasir musiqi əsərlərini dinləməyə dəvət edir. Bu layihə muzeyin özündə Azərbaycan və dünya incəsənətini əks etdirən ekspozisiyası ilə həmahənglik yaradır. Layihənin hər bir mərhələsi musiqi və təsviri sənətin müəyyən epoxasına həsr olunur. Konsertə gəlməklə həm musiqi dinləyəcək, həm də həmin dövrün sənət əsərləri ilə sizi yaxından tanış edəcək tematik ekskursiyada iştirak etmək kimi unikal imkan əldə edəcəksiniz. Nəticədə isə bu və digər epoxanın mədəniyyətini ayrılmaz vəhdətdə qavrayacaqsınız. Muzeyimiz Azərbaycanda yeganə məkandır ki, burada tamaşaçılar incəsənət aləminə belə çoxşaxəli səyahətdən həzz ala bilərlər.

PROQRAM

Tarix- mövzü / ifaçı – janr

Qeyd: Musiqi proqramları hər çərşənbə günü saat 19:00-da keçirilir. Giriş sərbəstdir.

Muzeydə mühazirə

Azərbaycan Milli İncəsənət Muzeyində hər həftənin 4-cü günü saat 16:00-da keçirilən mühazirələr incəsənət, tarix və mədəniyyətin müxtəlif sahələrinə dair dərin biliklər əldə etmək üçün mükəmməl bir fürsətdir. Təcrübəli mütəxəssislər tərəfindən təqdim olunan bu mühazirələr iştirakçılara keçmiş dövrlərə səyahət etmək, dəyərli sənət əsərlərinin məzmununu dolğun şəkildə anlamaq, onlarını gözəlliyini və unikallığını kəşf etmək imkanı verir.

Muzey kolleksiyasını təbliğ edən, onu daha yaxından tanımağa fürsət yaradan bu layihədə auditoriya ilə dialoqa da üstünlük verilir. Belə ki, dinləyicilər burada fikirlərini bölüşə və fərqli baxışlarını müzakirə edə bilərlər. Müxtəlif yaş qruplarına uyğun olaraq təşkil olunan mühazirələr maraqlı və maarifləndirici xarakterə malikdir.

Əvvəlcədən elan olunan proqrama baxaraq mühazirələrə qatıla bilərsiniz. Bununla yanaşı, sizə maraqlı olan mühazirə mövzuları haqqında təkliflərinizi gözləyirik.

PROQRAM

Tarix – mövzu – mühazirəçi

Qeyd: Mühazirələr hər həftənin 4-cü günü saat 16:00-da muzeyin kino zalında keçirilir. Giriş sərbəstdir.